老細足球

http://soccernet.espn.go.com/news/story?id=530083&cc=4716
雖然我唔係曼城球迷,更唔係艾歷臣嘅fans,(尤其佢做英格蘭領隊嘅時候)但實在為佢唔抵.
一隊球隊唔可以一朝就建立到,一隊能夠奪冠嘅球隊更需要時間建立.你可能會話車路士可以,但係"油王"艾巴莫域治入主前,有荷度,古列治同雲尼亞里建立咗基礎,同"油王"幾乎無限嘅金錢(其實今季"油王"已經表示會收水喉,將來亦唔會好似以前呾大手筆嚟買人),但好明顯幾乎每個球會班主仍然希望自己嘅球隊一鳴驚人,一球成名!
曼城近季都係中下游浮沉,06/07排名14,05/06排名15,04/05好d排第8,03/04排第16,而今季艾歷臣首次領隊係仲有一場聯賽未打嘅情況下排第9 而且兩勝同市嘅曼聯令艾歷臣極得球迷歡心.
但好明顯佢嘅泰國老闆-他信唔係咁諗,雖然到目前為止曼城未有宣佈同艾歷臣解約,但已經有好多嘅繼任人嘅傳言.相信今個暑假艾歷臣又要為飯碗諗計.
其實老細足球何止他信一人,皇馬前主席佩雷斯,國米班主莫拉提,甚至艾巴莫域治都係當中嘅代表,不同嘅係佩雷斯已經為佢嘅"銀河艦隊"政策而落台,而莫拉提終於肯放手,致令國米復興.
但可惜每個老闆嘅思維真係差不多,只會諗住錢係我出嘅,你就要用最快嘅方法令球隊成為冠軍球隊,你唔得就同我走,呢個位大把人跟住坐.
睇嚟呢d事只會不停咁上演,永冇落畫嘅日子.